लालबन्दीमा ७४३ किलो गाँजासहित दुई जना पक्राउ

सर्लाही । सर्लाहीको लालबन्दी नगरपालिका–१४ डाईनी टोलबाट प्रहरीले ठूलो परिमाणमा लागूऔषध गाँजासहित दुई जनालाई नियन्त्रणमा लिएको छ।

जिल्ला प्रहरी कार्यालय सर्लाहीका अनुसार विशेष सूचनाको आधारमा इलाका प्रहरी कार्यालय लालबन्दी र लागूऔषध नियन्त्रण ब्युरो कार्यालय बर्दिबास, महोत्तरीबाट खटिएको संयुक्त प्रहरी टोलीले बुधबार घरमा छापा मारेको थियो।

प्रहरीले घरमा लुकाइछिपाइ राखिएको ड्रम तथा बोराबाट अन्दाजी ७४३.९८० किलोग्राम लागूऔषध गाँजा बरामद गरेको जनाएको छ।

गाँजासहित लालबन्दी नगरपालिका–१४ डाईनी टोल बस्ने ६७ वर्षीय नरबहादुर थिङ र सोही स्थानकी ५२ वर्षीया जेसुनमाया थिङलाई नियन्त्रणमा लिइएको प्रहरीले जनाएको छ।

यस्तै, बरामद गरिएको गाँजा नियन्त्रणमा लिएपछि प्रहरी टोलीले आसपासको क्षेत्रमा गस्ती गर्ने क्रममा मकैबारी पछाडि करिब २ कट्ठा सार्वजनिक जग्गामा गाँजाको खेती गरिएको फेला पारेको थियो। उक्त स्थानमा लगाइएको गाँजाका बेर्नासमेत प्रहरीले नष्ट गरेको जिल्ला प्रहरी कार्यालय सर्लाहीले जनाएको छ।

घटनाबारे इलाका प्रहरी कार्यालय लालबन्दीबाट थप अनुसन्धान भइरहेको प्रहरीले जनाएको छ।