मलङ्गवा (सर्लाही), साउन १५। सशस्त्र प्रहरी बल नेपाल सीमा सुरक्षा गुल्म मलङ्गवाको टोलीले ३०० लिटर अवैध घरेलु मदिरासहित एक सवारी साधन नियन्त्रणमा लिएको छ।

मलङ्गवा नगरपालिका–१२ गम्हरिया अन्तर्गत नवलपुर–मलङ्गवा सडक खण्डमा खटिएको प्रहरी पिकेट टोलीले शंकास्पद अवस्थामा गुडिरहेको यात्रुवाहक म्याजिक गाडीलाई जाँच गर्ने क्रममा उक्त मदिरा बरामद गरेको हो।

प्रहरीका अनुसार नवलपुरबाट मलङ्गवातर्फ आउँदै गरेको सवारी साधनमा प्लास्टिकका बाल्टी तथा ड्रममा लुकाइछिपाई ल्याउँदै गरिएको ३०० लिटर अवैध लोकल घरेलु मदिरा फेला परेको थियो। बरामद मदिराको अनुमानित बजार मूल्य करिब रु. ७५ हजार रहेको जनाएको छ।

बरामद मदिरा तथा सवारी साधनलाई नियन्त्रणमा लिई स्थानीय जनप्रतिनिधि, पत्रकार तथा सर्वसाधारणको रोहवरमा मुचुल्का तयार गरी कानुनी प्रक्रिया अघि बढाइएको थियो। त्यसपछि कानुनी प्रक्रिया पूरा गरी नियन्त्रणमा लिइएको ३०० लिटर अवैध घरेलु मदिरा नष्ट गरिएको सशस्त्र प्रहरी बलले जनाएको छ।

सीमावर्ती क्षेत्रमा हुने अवैध ओसारपसार, चोरी–पैठारी तथा गैरकानुनी गतिविधि नियन्त्रणका लागि सुरक्षा जाँच तथा निगरानीलाई थप प्रभावकारी बनाइएको सशस्त्र प्रहरीको भनाइ छ।