कोशी प्रदेशमा ‘उदय परियोजना’ सुरु, युवालाई उद्यमशीलतामा प्रोत्साहन

विराटनगर, १८ चैत

– कोशी प्रदेश सरकारले युवालाई लक्षित गर्दै ‘उदय परियोजना’ सञ्चालन गर्ने भएको छ। मुख्यमन्त्री हिक्मत कुमार कार्कीले इलामको सूर्योदय नगरपालिका–३ बौद्धधाममा निर्माण गरिएको बुद्ध प्रतिमा सहितको पार्क उद्घाटन गर्दै नवप्रवर्तन कार्यक्रमअन्तर्गत उक्त परियोजना अघि बढाइने जानकारी दिएका छन्।

मुख्यमन्त्री कार्कीका अनुसार, परियोजनाको औपचारिक शुभारम्भ बिहीबार सुनसरीको इटहरीमा हुने कार्यक्रममार्फत गरिनेछ। यस अन्तर्गत साना तथा मझौला उद्योग सञ्चालन गर्न इच्छुक युवालाई ३० लाखदेखि ३ करोड रुपैयाँसम्म सहुलियत ब्याजदरमा ऋण उपलब्ध गराइनेछ। हिमाली र पहाडी जिल्लाका युवालाई १० लाख रुपैयाँसम्म सहुलियत ऋण उपलब्ध हुने व्यवस्था गरिएको छ। यसका लागि ३०–४० प्रतिशत धितोमा ऋण प्रवाह गरिने छ।

प्रदेश सरकारले गत वर्षदेखि ब्याज अनुदान कार्यक्रम मार्फत हाल १५० भन्दा बढी परियोजना सञ्चालनमा राखेको छ। कृषि मन्त्रालयमार्फत ६ करोड रुपैयाँ विनियोजन गरिएको यस कार्यक्रममा प्रदेश सरकारले कुल लगानीको ६ प्रतिशत ब्याज व्यहोर्दै आएको छ। मुख्यमन्त्री कार्कीले यस्तो पहलले पहाडी क्षेत्रका युवामा उद्यमशीलता बढाउने र बेरोजगारी समस्या समाधानमा टेवा पुग्ने विश्वास व्यक्त गरे।

उद्घाटन कार्यक्रममा करिब ८ करोड रुपैयाँको लागतमा निर्माण गरिएको ६५ फिट अग्लो बुद्ध प्रतिमा सहितको पार्क १७ रोपनी क्षेत्रफलमा फैलिएको छ। पार्कले नेपाल, भारत र अन्य मुलुकका पर्यटकका लागि आकर्षणको केन्द्र बन्ने अपेक्षा गरिएको छ। मुख्यमन्त्री कार्कीले आगामी दिनमा पार्कमा आवश्यक संरचना निर्माण गर्ने जिम्मेवारी प्रदेश सरकारले लिने र यसलाई धार्मिक तथा पर्यटकीय क्षेत्रको सूचीमा समावेश गरिने जानकारी दिए।

सूर्योदय नगरपालिकाका कार्यवाहक नगरप्रमुख दुर्गा कुमार बरालले पार्क सञ्चालनसँगै स्थानीय पर्यटन प्रवद्र्धन र आर्थिक गतिविधि बढ्ने विश्वास व्यक्त गरे। स्थानीय व्यवसायीहरूले पनि पार्क आसपास अन्य पर्यटकीय संरचना निर्माण गरिरहेका छन्।