मालंगवा–१० स्थित खेल मैदानको दुर्दशा, जिम्मेवार को ?

सर्लाही जिल्लाको मालंगवा नगरपालिका–१० मा अवस्थित सार्वजनिक खेल मैदान हाल अत्यन्तै दुर्गन्धित र फोहोर अवस्थामा पुगेको छ। उक्त खेल मैदानमा २ जना सरसफाइ कर्मचारी खटाइएका भए पनि मैदानको अवस्था भने दिनानुदिन बिग्रँदै गएको स्थानीयको गुनासो छ।
खेल मैदान वरपर जथाभावी फोहोर थुप्रिनुका साथै केही मानिसहरूले सोही स्थानलाई खुला शौचालयको रूपमा प्रयोग गर्ने गरेको पाइएको छ। यसले खेलकुद गतिविधि मात्र होइन, वरपर बसोबास गर्ने स्थानीय बासिन्दाको स्वास्थ्यमा समेत     गम्भीर असर पारिरहेको छ।

स्थानीय युवाहरूका अनुसार, मैदानमा खेल खेल्न जाने वातावरण नरहेकाले बालबालिका र खेलाडीहरू निराश भएका छन्। “सरसफाइ कर्मचारी हुँदा हुँदै पनि यस्तो अवस्था हुनु दुःखद हो,” एक स्थानीयले भने।
अब प्रश्न उठेको छ— यस खेल मैदानको सरसफाइ र व्यवस्थापनको जिम्मेवारी कसको हो ?
नगरपालिका, वडा कार्यालय वा सम्बन्धित निकायले यस विषयमा चासो नदिँदा सार्वजनिक सम्पत्तिको दुरुपयोग भइरहेको स्थानीयको आरोप छ।
स्थानीयवासीहरूले मालंगवा नगरपालिका र वडा कार्यालयसँग तत्काल सरसफाइ, शौचालय व्यवस्थापन तथा नियमित अनुगमन गर्न माग गरेका छन्। समयमै ध्यान नदिइए खेल मैदान पूर्ण रूपमा प्रयोगविहीन बन्ने खतरा रहेको उनीहरूको चेतावनी छ।