मलङ्गवामा ३०० लिटर घरेलु मदिरासहित सवारी नियन्त्रणमा  मलङ्गवा (सर्लाही)

सशस्त्र प्रहरी बल नेपाल सीमा सुरक्षा गुल्म मलङ्गवाको टोलीले ठूलो परिमाणमा अवैध घरेलु मदिरा नियन्त्रणमा लिएको छ।

मलङ्गवा नगरपालिका वडा नं. १२ स्थित गम्हरियाको नवलपुर-मलङ्गवा सडक खण्डमा खटिएको प्रहरी पिकेट टोलीले शंकास्पद अवस्थामा गुडिरहेको यात्रुवाहक म्याजिक गाडीलाई जाँच गर्ने क्रममा उक्त मदिरा बरामद गरेको हो।

नवलपुरबाट मलङ्गवातर्फ आउँदै गरेको सवारी साधनलाई रोकेर तलासी लिँदा गाडीभित्र प्लास्टिकका बाल्टी तथा ड्रमहरूमा लुकाएर ल्याउँदै गरिएको ३०० लिटर अवैध लोकल घरेलु मदिरा फेला परेको प्रहरीले जनाएको छ। बरामद गरिएको मदिराको अनुमानित बजार मूल्य करिब रु. ७५,०००/- (पचहत्तर हजार) रहेको छ।

प्रहरीका अनुसार मदिरा र सवारी साधनलाई नियन्त्रणमा लिई स्थानीय प्रतिनिधि, पत्रकार तथा सर्वसाधारणको रोहवरमा मुचुल्का तयार गरी आवश्यक कानुनी कारबाहीका लागि अगाडि बढाइएको छ। सीमावर्ती क्षेत्रमा हुने अवैध ओसारपसार तथा चोरी-पैठारी नियन्त्रणका लागि सुरक्षा उपस्थिति र चेकिङलाई थप कडा बनाइएको सशस्त्र प्रहरीले जनाएको छ।