समानुपातिकतर्फ २ करोडभन्दा बढी मतपत्र छपाइ सम्पन्न

आगामी फागुन २१ गते हुने प्रतिनिधिसभा सदस्य निर्वाचनका लागि मतपत्र छपाइको काम तीव्र गतिमा अघि बढिरहेको छ। निर्वाचन आयोगका अनुसार समानुपातिक प्रणालीतर्फ प्रयोग हुने मतपत्रको छपाइ सम्पन्न भइसकेको छ भने प्रत्यक्षतर्फको मतपत्र छपाइ प्रक्रिया सुरु गरिएको छ।

जनक शिक्षा सामग्री केन्द्रको छापाखानामा भइरहेको छपाइ कार्य नेपाली सेनाको कडा सुरक्षा घेराभित्र सञ्चालन भइरहेको आयोगले जनाएको छ। कार्यवाहक प्रमुख निर्वाचन आयुक्त रामप्रसाद भण्डारीका अनुसार समानुपातिकतर्फ २ करोड ८ लाख ३० हजार मतपत्र छपाइ भइसकेको छ।

आयोगले फागुन ५ गतेभित्र सबै मतपत्र सम्बन्धित निर्वाचन क्षेत्रमा पुर्‍याइसक्ने लक्ष्य राखेको छ। मतदान अधिकृतहरूले कानुनअनुसार मतदान हुने दिनमात्रै सिल गरिएको मतपत्र खोल्न पाउने व्यवस्था गरिएको छ। मतपत्र ढुवानी पनि उच्च सुरक्षा सतर्कताका साथ गरिने आयोगको भनाइ छ।

यस्तै, प्रत्यक्षतर्फको मतपत्र छपाइ १५ दिनभित्र सम्पन्न हुने अनुमान गरिएको छ। प्रत्यक्षतर्फ उम्मेदवारी दिएका उम्मेदवारहरूको अन्तिम नामावली प्रकाशित भइसकेको छ भने समानुपातिकतर्फ बन्दसूचीमा रहेका उम्मेदवारहरूको अन्तिम नामावली माघ २० गते सार्वजनिक गर्ने कार्यतालिका रहेको आयोगले जानकारी दिएको छ।

निर्वाचन आयोगले राजनीतिक दल तथा उम्मेदवारहरूबाट निर्वाचन आचारसंहिताको पूर्ण पालना हुने विश्वास व्यक्त गरेको छ।