नेकपा र लिम्बुवान क्रान्तिकारी पार्टी तथा जसपा (थापा मगर समूह) बीच एकता सहमति

नेपाली कम्युनिष्ट पार्टी (नेकपा) ले लिम्बुवान क्रान्तिकारी पार्टी र जनता समाजवादी पार्टी नेपाल (जसपा) को एक समूहसँग पार्टी एकता तथा समायोजनसम्बन्धी महत्वपूर्ण सहमति गरेको छ। विभिन्न राजनीतिक धारका शक्तिहरूलाई एकै मोर्चामा ल्याउने उद्देश्यसहित गरिएको यो सहमतिलाई समकालीन राजनीतिमा अर्थपूर्ण कदमका रूपमा हेरिएको छ।
मनिष लिम्बू ‘हेल्लोक’ नेतृत्वको लिम्बुवान क्रान्तिकारी पार्टीसँग भएको सहमतिअनुसार लिम्बुवान पहिचानसम्बन्धी विषयलाई नेकपाको आन्तरिक जनवादी अभ्यासअन्तर्गत खुला छलफल र बहसमार्फत निष्कर्षमा पुर्‍याइनेछ। साथै, लिम्बुवान क्रान्तिकारी पार्टीका केन्द्रीयदेखि स्थानीय तहसम्मका सबै संरचनालाई सम्मानजनक रूपमा नेकपामा समायोजन गरिने सहमति भएको छ।
उक्त सहमति पत्रमा लिम्बुवान क्रान्तिकारी पार्टीका अध्यक्ष मनिष लिम्बू ‘हेल्लोक’ तथा नेकपाका शीर्ष नेता पुष्पकमल दाहाल ‘प्रचण्ड’ र माधव कुमार नेपालले हस्ताक्षर गरेका छन्।
यसैक्रममा, जसपा नेपालका केन्द्रीय उपाध्यक्ष शिवलाल थापा मगरको नेतृत्वमा रहेको समूहसँग पनि नेकपाले पार्टी एकीकरणसम्बन्धी सहमति टुंग्याएको छ। सहमतिअनुसार मुलुकको सार्वभौमिकता, स्वाधीनता र भौगोलिक अखण्डताको संरक्षण गर्दै पहिचान र अधिकारसहितको संघीय समाजवादी गणतन्त्र स्थापना गर्ने लक्ष्यमा संयुक्त संघर्ष जारी राखिने उल्लेख छ।
सहमति पत्रमा संघीय शासन प्रणालीको सुदृढीकरण, लोकतान्त्रिक मूल्य–मान्यताको संरक्षण, तथा वर्गीय, जातीय, क्षेत्रीय र लैङ्गिक विभेदको अन्त्य गर्दै न्यायपूर्ण र समतामूलक समाज निर्माण गर्ने प्रतिबद्धता व्यक्त गरिएको छ। शिवलाल थापा मगर नेतृत्वको समूहका केन्द्रीयदेखि पालिकास्तरका नेता–कार्यकर्ताहरूलाई आपसी समझदारीका आधारमा नेकपामा समायोजन गरिने निर्णय पनि गरिएको छ।
समायोजन कार्यक्रममा बोल्दै नेकपा संयोजक पुष्पकमल दाहाल ‘प्रचण्ड’ले पार्टीप्रति जनविश्वास पुनः मजबुत बन्दै गएको दाबी गरे। गुठी आन्दोलन, सहकारी पीडितहरूको संघर्ष तथा सुकुम्बासी र खोला किनारमा बसोबास गर्ने नागरिकका मुद्दासँग लामो समयदेखि जोडिएका व्यक्तिहरू नेकपामा आबद्ध हुन थालेको उल्लेख गर्दै उनले यसले देशभर नयाँ राजनीतिक ऊर्जा सिर्जना गरेको बताए।
“जब अन्य ठूला दलहरू आन्तरिक विभाजनमा अल्झिरहेका छन्, नेकपा भने एकताको माध्यमबाट राष्ट्रिय शक्तिहरूलाई जोड्दै समाजवादी आन्दोलनलाई व्यवस्थित ढंगले अघि बढाइरहेको छ,” दाहालले भने, “आगामी निर्वाचनसम्म आइपुग्दा नेकपा फरक हैसियत र बलियो आधारसहित जनतामाझ उभिनेछ भन्ने विश्वास छ।”