जनता समाजवादी पार्टी, नेपालले सार्वजनिक गर्‍यो चुनावी घोषणा–पत्र

१ फागुन, काठमाडौं ।

जनता समाजवादी पार्टी, नेपाल (जसपा) ले प्रतिनिधिसभा सदस्य निर्वाचन २०८२ का लागि आफ्नो चुनावी घोषणा–पत्र सार्वजनिक गरेको छ । ‘सङ्घर्षसँगै समृद्धितर्फ’ भन्ने मूल नारासहित सार्वजनिक गरिएको घोषणा–पत्रमा पार्टीले संघीयता, समानता, सामाजिक न्याय, समृद्धि र समाजवादलाई प्रमुख एजेन्डाका रूपमा अघि सारेको छ ।

पार्टीले विगतका राजनीतिक आन्दोलन, दशवर्षे सशस्त्र विद्रोह, जनआन्दोलन तथा मधेश जनविद्रोहबाट प्राप्त उपलब्धिलाई संस्थागत गर्दै संघीय लोकतान्त्रिक गणतन्त्रलाई थप सुदृढ बनाउने प्रतिबद्धता जनाएको छ । साथै, संविधानका त्रुटि सच्याउँदै संघीय पुनर्संरचना प्रभावकारी बनाउने, समानुपातिक प्रतिनिधित्व सुनिश्चित गर्ने र समावेशी लोकतन्त्रलाई व्यवहारमा कार्यान्वयन गर्ने उल्लेख गरिएको छ ।

घोषणा–पत्रमा वर्तमान राजनीतिक अवस्थाप्रति असन्तोष व्यक्त गर्दै अस्थिर गठबन्धन राजनीति, सिद्धान्तहीनता र बढ्दो भ्रष्टाचारका कारण जनविश्वास कमजोर बनेको आरोप लगाइएको छ । आर्थिक क्षेत्रमा सार्वजनिक ऋण वृद्धि, रेमिट्यान्समा निर्भरता, घरेलु उत्पादनमा गिरावट तथा बढ्दो युवा बेरोजगारीलाई गम्भीर चुनौतीका रूपमा औंल्याइएको छ ।

जसपा, नेपालले गुणस्तरीय शिक्षा र स्वास्थ्य सेवामा नागरिकको पहुँच सुनिश्चित गर्ने, न्याय प्रणालीलाई सुलभ र प्रभावकारी बनाउने तथा युवालाई देशमै रोजगारी सिर्जना गर्ने प्रतिबद्धता जनाएको छ । सामाजिक सुरक्षासहितको लोककल्याणकारी राज्य स्थापना, सहभागितामूलक लोकतन्त्र सुदृढीकरण र सुशासनमार्फत आर्थिक–सामाजिक न्यायसहितको समतामूलक समृद्धि हासिल गर्ने लक्ष्य पनि अघि सारिएको छ ।

पार्टीले राष्ट्रिय तथा जातीय पहिचानसहितको संघीयता संस्थागत गर्दै समाजवादी अर्थ–राजनीतिक कार्यदिशा लागू गर्ने जनाएको छ । साथै, समानुपातिक निर्वाचन प्रणालीलाई थप बलियो बनाउँदै आदिवासी जनजाति, दलित, महिला, मुस्लिम, थारू, पिछडावर्गलगायत सीमान्तकृत समुदायको प्रतिनिधित्व सुनिश्चित गर्ने प्रतिवद्धता व्यक्त गरेको छ ।

जसपा, नेपालले आफ्नो चुनाव चिन्ह ‘छाता’ मा मतदान गर्न मतदातासमक्ष आह्वान गर्दै समावेशी विकास र दिगो समृद्धिको दिशामा देशलाई अघि बढाउने दाबी गरेको छ ।