बझाङ । बझाङ जिल्ला क्रिकेट संघको अध्यक्षमा प्रविन्द्रबहादुर धामी निर्वाचित भएका छन् । संघको आइतबार सम्पन्न छैटौं अधिवेशनबाट धामी नयाँ कार्यसमितिको अध्यक्षमा चुनिएका हुन् ।

अन्य सबै पदमा सर्वसम्मत नेतृत्व चयन भए पनि अध्यक्ष पदका लागि भने निर्वाचन भएको थियो । अध्यक्षका लागि प्रविन्द्रबहादुर धामी र जोगबहादुर दौल्याल चुनावी प्रतिस्पर्धामा उत्रिएका थिए ।

कुल २२ मत खसेकाे निर्वाचनमा धामीले १४ मत प्राप्त गरे भने उनका निकटतम प्रतिद्वन्द्वी दौल्यालले ८ मत मात्रै पाए । धामी ६ मतको अन्तरले विजयी भएका हुन् ।

अध्यक्षबाहेकका अन्य पदाधिकारी तथा सदस्यहरू भने निर्विरोध निर्वाचित भएका छन् । संघको उपाध्यक्षमा हर्कबहादुर दौल्याल, सचिवमा सुरेन्द्रबहादुर सिंह र कोषाध्यक्षमा उमा पुरी सर्वसम्मत चयन भएका छन् ।

त्यस्तै, सदस्यहरूमा केन्द्रबहादुर विष्ट, विकास राय, लोकेन्द्रबहादुर कठायत, विनोद रावल, जयराज धामी, जनकबहादुर धामी, लोकेन्द्रकुमार दौल्याल, पुष्कर दौल्याल, देउपाल जप्रेल, हंशबहादुर धामी र लोकपाल दौल्याल निर्वाचित भएका छन् ।

नवनिर्वाचित १५ सदस्यीय कार्यसमितिले बझाङमा क्रिकेट खेलको विकास र प्रवर्द्धनका लागि आगामी दिनमा विशेष योजनासहित काम गर्ने प्रतिबद्धता जनाएको छ ।