राजनीतिक गतिविधि बढेपछि मधेसमा हाई अलर्ट, प्रहरीको कडा निगरानी

POWER OF MADHESH | १४ चैत्र

जनकपुर । देशमा विकसित राजनीतिक गतिविधिलाई मध्यनजर गर्दै मधेस प्रदेशमा उच्च सतर्कता अपनाइएको छ। नेपाल प्रहरी मुख्यालयको निर्देशनअनुसार मधेस प्रहरीलाई हाई अलर्टमा बस्न सर्कुलर जारी गरिएको हो।

पूर्व प्रधानमन्त्री केपी शर्मा ओली तथा पूर्व गृहमन्त्री रमेश लेखक पक्राउ परेपछि सुरक्षा चुनौती बढ्न सक्ने आकलनसहित यस्तो निर्देशन आएको जनाइएको छ।

शनिबार बिहानदेखि नै हाई अलर्टमा रहन निर्देशन प्राप्त भएको मधेस प्रदेश प्रहरी कार्यालय ले जनाएको छ। प्रदेश प्रहरी कार्यालयका प्रमुख गोविन्द थपलिया का अनुसार गृह मन्त्रालय र प्रहरी प्रधान कार्यालयमार्फत औपचारिक रूपमा सर्कुलर जारी भएको हो।

डिआइजी थपलियाका अनुसार पछिल्लो राजनीतिक घटनाक्रमलाई ध्यानमा राख्दै मधेस प्रहरी र मातहतका सबै युनिटलाई उच्च सतर्कतामा राखिएको छ। “आजदेखि सबै राजनीतिक गतिविधिबारे सूक्ष्म रूपमा सूचना संकलन सुरु गरेका छौँ,” उनले भने, “आठवटै जिल्लाका प्रहरी प्रमुखसँग समन्वय गर्दै आवश्यक ठाउँमा प्रहरी परिचालन भइरहेको छ।”

उनका अनुसार हाई अलर्टसँगै कडा निगरानी बढाइएको छ भने जिल्ला प्रहरी प्रमुखसहित सम्पूर्ण प्रहरी कर्मचारीको बिदा पनि स्थगित गरिएको छ।

करिब सात महिना अघि भएको भदौको घटनासम्बन्धी जाँचबुझ आयोगको सिफारिसका आधारमा ओली र लेखक पक्राउ परेपछि मधेस क्षेत्रमा पनि आन्दोलन र प्रदर्शन हुन सक्ने सम्भावनालाई ध्यानमा राख्दै सुरक्षा सतर्कता बढाइएको हो।

मधेस प्रदेशमा पर्सा, बारा, रौतहट, सर्लाही, महोत्तरी, धनुषा, सिराहा र सप्तरी गरी ८ जिल्ला रहेका छन्। ती सबै जिल्लामा प्रहरी परिचालन सुदृढ पारिएको र १० हजारभन्दा बढी प्रहरी जनशक्ति तयारी अवस्थामा राखिएको प्रहरी स्रोतले जनाएको छ।