हिन्दूराष्ट्रका लागि संविधान संशोधन भए सरकारलाई सहयोग : कमल थापा

काठमाडौं, २८ फागुन।

राष्ट्रिय प्रजातन्त्र पार्टीक नेता कमल थापा ले सम्भावित नयाँ सरकार हिन्दूराष्ट्र स्थापनाको विषयमा संविधान संशोधन गर्न तयार भए आफ्नो दलका सांसदहरूले पूर्ण सहयोग गर्ने बताएका छन्।

सामाजिक सञ्जाल फेसबुक मार्फत धारणा सार्वजनिक गर्दै थापाले राष्ट्रिय स्वतन्त्र पार्टी तथा बालेन शाह को नेतृत्वमा बन्ने सम्भावित सरकारलाई संसदमा दुईतिहाइ बहुमतका लागि दुई सिट अपुग रहेको उल्लेख गरेका छन्।

उनका अनुसार यदि उक्त सरकारले नेपाललाई धार्मिक स्वतन्त्रता र समानताको सुनिश्चिततासहित हिन्दूराष्ट्र बनाउने गरी संविधान संशोधन गर्न तयार भए राष्ट्रिय प्रजातन्त्र पार्टीका पाँच सांसदहरूको पूर्ण सहयोग रहनेछ।