इनिशा विक हत्या प्रकरणमा न्याय माग्दै आन्दोलनको चेतावनी

१२ चैत, काठमाडौं — सुर्खेतकी इनिशा विक हत्या प्रकरणमा अनुसन्धान ढिलाइ भएको र दोषीलाई अहिलेसम्म कारबाही नगरिएको भन्दै संघर्ष समितिले कडा आपत्ति जनाएको छ। बिहीबार काठमाडौंमा आयोजित पत्रकार सम्मेलनमा समितिका सदस्यहरूले किटानी जाहेरीसमेत लिन नमानेको र दोषीलाई जोगाउने प्रयास भएको आरोप लगाएका छन्।

समितिका अनुसार घटनामा न्याय दिन नसक्नु राज्यको असफलता भएको प्रमाण हो। अभियन्ता जीवन तिरुवा ले महिलामाथि हुने हिंसाका घटनामा निरन्तर संघर्ष आवश्यक रहेको बताउँदै इनिशा विकले न्याय नपाएसम्म शव नउठाउने चेतावनी दिएका छन्। उनले राज्यले स्पष्ट जवाफ नदिएसम्म आन्दोलन जारी रहने र त्यसबाट हुने परिणामको जिम्मेवारी सरकारले लिनुपर्ने बताए।

पत्रकार सम्मेलनमा बोल्दै सविना सिंह ठकुरी ले १७ दिनदेखि सडक संघर्ष जारी रहे पनि पीडितले न्याय नपाएको गुनासो गरिन्। सामाजिक सञ्जालमा घटनालाई तोडमोड गरेर प्रस्तुत गरिएको भन्दै उनले असहमति जनाउँदै अन्य पीडित महिलाहरूको न्यायका लागि पनि आन्दोलन जारी रहने बताइन्।

संघर्ष समितिले भोलि चैत १३ गते शान्तिपूर्ण आन्दोलन गर्ने घोषणा गरेको छ भने अनुसन्धान निष्पक्ष नभएको आरोप लगाउँदै एसपी सुधीरराज शाहीको राजीनामा माग गरेको छ। साथै महिला आयोगकी अध्यक्षको समेत राजीनामा मागिएको छ।

त्यस्तै, काठमाडौं महानगरपालिकाका मेयर बालेन शाह ले पनि यस विषयमा ध्यान दिनुपर्ने उनीहरूको भनाइ छ। महिलामाथि हुने हिंसाका घटनामा सरकारको भूमिकामाथि प्रश्न उठाउँदै समितिले आवश्यक कदम नचालिए संघर्ष थप सशक्त बनाउने चेतावनी दिएको छ।