सर्लाहीका रोहित र गणेश बागमती नदीमा बेपत्ता भएपछि मृत भेटिए

१० जेठ, सर्लाही ।

सर्लाही, रौतहट र मकवानपुरको सीमा क्षेत्रमा पर्ने बागमती नदीमा बेपत्ता भएका दुई युवक मृत अवस्थामा फेला परेका छन् । शनिबार दिउँसो नदीले बगाएर बेपत्ता भएका सर्लाही लालबन्दी नगरपालिका–९ बस्तिपुरका १८ वर्षीय रोहित महतो र लालबन्दी नगरपालिका–५ का २१ वर्षीय गणेश महतोको शव आइतबार फेला परेको हो ।

पाँच जना साथीहरूसँग नुनथर घुम्न गएका उनीहरू बागमती नदी तर्ने क्रममा डुबेर बेपत्ता भएका थिए । अन्य तीन जना भने सकुशल रहेका छन् ।

जिल्ला प्रहरी कार्यालय सर्लाहीका प्रवक्ता एवं डीएसपी सरोज राईका अनुसार रोहितको शव आइतबार बिहान बागमती सिँचाइ आयोजनाको ड्यामभन्दा तल खोलामा फेला परेको थियो भने गणेशको शव दिउँसो बागमती नगरपालिका–११ क्षेत्रमा ड्यामभन्दा उत्तरतर्फ पानीमा तैरिरहेको अवस्थामा भेटिएको हो ।

स्थानीय, परिवारका सदस्य र सुरक्षाकर्मीको संयुक्त खोजीपछि दुवैको शव फेला परेको प्रहरीले जनाएको छ । शव पोस्टमार्टमका लागि प्रादेशिक अस्पताल मलंगवा पठाइएको छ ।

स्थानीयका अनुसार नुनथर र बागमती सिँचाइ आयोजनाको ड्याम आसपास क्षेत्रमा पौडी खेल्न निषेध गरिए पनि बाहिरी क्षेत्रबाट आउने युवाहरू नदीमा पस्ने गरेका छन् । सो क्षेत्रमा यसअघि पनि डुबेर मृत्यु हुने घटना हुँदै आएका छन् ।

घटनाबारे थप अनुसन्धान भइरहेको प्रहरीले जनाएको छ ।