लामिछानेद्वारा पार्टीभित्र एकता र देश केन्द्रित राजनीति आवश्यक ठहर

काठमाडौं, ४ चैत

– राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीभित्र एकता, निडरता र देश केन्द्रित राजनीति आवश्यक रहेको बताएका छन्।

बुधबार रास्वपाको अभिमुखीकरण कार्यक्रमको दोश्रो दिन सम्बोधन गर्दै लामिछानेले गुटगत राजनीति त्यागेर सबै कार्यकर्ता एउटै छानामुनि एकताबद्ध हुनुपर्नेमा जोड दिएका छन्। उनले भने,

“आँखामा जुन समस्या देखिन्छ, त्यसलाई तत्काल समाधान गर्नुपर्छ। पुराना राजनीतिक दललाई जस्तो हामीलाई जनता लामो समय कुर्दैनन्। कानुन निर्माता बन्ने दौड स्वार्थ समूहको घरघरमा छैन। गुट बनाएर कांग्रेस, एमाले जितिँदैन। घण्टीसँग सबै अटाउन सक्छौं।”

लामिछानेले आफ्नो पार्टीले निडर र स्थिर रूपमा अघि बढेको उल्लेख गर्दै चुनावमार्फत शक्ति प्रदर्शन गर्ने तयारीमा रहेको जानकारी दिएका छन्। उनले नागरिकको चेतनामा विश्वासका कारण आफ्नो पार्टी सफल भएको बताए।

कार्यकर्तालाई सचेत गराउँदै उनले चेतावनी दिए कि यदि व्यक्तिगत स्वार्थ र पदलोलुपता त्यागेर देश केन्द्रित राजनीति गर्न नसकिने हो भने पुराना दलभन्दा पनि खराब अवस्था हुने छ। उनले जोड दिए,

“आफ्नो हैसियत, पद वा पोजिसनमा केन्द्रित हुने होइन, देशलाई केन्द्रमा राख्नुपर्छ। केन्द्रित राजनीतिबाट बाहिर उठेर देश केन्द्रित राजनीति नगरे पुराना दलभन्दा पनि बत्तर हुनेछ।”

लामिछानेको यो अभिव्यक्ति रास्वपाका कार्यकर्ता र समर्थकहरूलाई एकताबद्ध र सक्रिय रहन प्रेरित गर्ने प्रयासका रूपमा लिइएको छ।