सर्वोच्च अदालत जाने कांग्रेस निवर्तमान सांसदहरूको कार्यक्रम रोकियो

१५ माघ, काठमाडौं — नेपाली कांग्रेसका निवर्तमान सांसदहरूले संसद् पुनःस्थापनासम्बन्धी रिट शीघ्र सुनुवाइमा ल्याउन माग गर्दै सर्वोच्च अदालत जाने तय गरेको कार्यक्रम हाललाई स्थगित गरिएको छ।

स्रोतका अनुसार उनीहरूले प्रधानन्यायाधीश प्रकाशमान सिंह राउतसँग भेट गरी रिटलाई पेशीमा चढाउन आग्रह गर्ने तयारी गरेका थिए। तर आन्तरिक कारणका साथै वर्तमान राजनीतिक परिस्थितिलाई मध्यनजर गर्दै उक्त कार्यक्रम रोकिन पुगेको हो।

विघटित प्रतिनिधि सभाका कांग्रेसका पूर्व प्रमुख सचेतक श्याम घिमिरेले विशेष कारणले अदालत जाने योजना तत्कालका लागि स्थगित गरिएको जानकारी दिए। कांग्रेस नेताहरू बिहीबार बिहान १० बजे सर्वोच्च पुग्ने तयारीमा थिए।

निर्वाचनको वातावरणमा संसद् पुनःस्थापनाको विषयलाई अगाडि बढाउँदा पार्टीभित्र अनावश्यक विवाद र असमझदारी सिर्जना हुन सक्ने निष्कर्षमा पुगेर कार्यक्रम स्थगित गरिएको नेताहरूको भनाइ छ।