रामबहादुर थापा बादल नेकपा एमाले संसदीय दलको नेता निर्विरोध निर्वाचित

काठमाडौँ, १८ चैत – नेकपा एमालेको संसदीय दलको नेतामा रामबहादुर थापा बादल निर्विरोध निर्वाचित भएका छन्। बुधबार बसेको संसदीय दलको बैठकले पार्टी उपाध्यक्षसमेत रहेका बादललाई सर्वसम्मत रूपमा दलको नेता चयन गरेको हो।

दलको नेताका लागि उम्मेदवार रहेका सुहाङ नेम्वाङले समर्थक र प्रस्तावक नपाएपछि बादल निर्विरोध निर्वाचित घोषणा गरिएको थियो।

नेता चयनपछि बैठकका निर्णय सार्वजनिक गर्दै बादलले भने, “आजको बैठकले संसदीय दलको नेता सर्वसम्मतिले चयन गरेको छ। दल नेताको रूपमा मलाई चयन गरिएको छ। निकट भविष्यमा दुवै सदनका माननीय सदस्यहरूलाई अभिमुखीकरण कार्यक्रम यही २१ गते गर्ने तय गरिएको छ।”

बादलले बैठकले केपी शर्मा ओली र रमेश लेखकको गैरकानुनी तथा पूर्वाग्रहपूर्ण गिरफ्तारीको विरोधमा प्रस्ताव पारित गरेको पनि जानकारी दिए। उनले भोलि हुने प्रतिनिधिसभा तथा आगामी दिनमा हुने प्रतिनिधिसभा र राष्ट्रिय सभाका बैठकहरूमा आफ्ना एजेन्डा सशक्त रूपमा उठाउने संकल्प व्यक्त गरे। “हामीले घोषणापत्रमा गरेका प्रतिबद्धताहरू संसदमा उठाउनेछौं र प्रतिपक्षको भूमिका निर्वाह गर्दै सजग पहरेदारका रूपमा काम गर्नेछौं,” उनले थपे।

उम्मेदवार नेम्वाङले नेता चयन प्रक्रियाबारे प्रतिक्रिया दिँदै आफूले अपेक्षा गरेअनुसार परिणाम नआएको बताए। उनले भने, “मभन्दा अर्को उम्मेदवार संसदीय दलको नेता हुन योग्य छ भन्ने खालको नतिजा आएको छ। संसद भित्र जाने बेलामा कोही पनि सत्तापक्ष, प्रतिपक्ष भनेर आफूलाई अगाडि नै सोचेर हिड्ने हो भने जनता र देशको हितमा कहिले पनि राम्रो हुँदैन। हामीले सशक्त ढंगले सरकारले गरेका राम्रा कामलाई सहयोग गर्नुपर्छ र कमीकमजोरी औंल्याउँदै रचनात्मक सल्लाह दिनुपर्छ।”

नेम्वाङले नयाँ पुस्ताले नेतृत्व पाउनुपर्नेमा जोड दिँदै दलको भविष्यमा यसले योगदान पुर्याउने विश्वास व्यक्त गरे।

प्रतिनिधिसभामा एमालेका २५ सांसद छन्।