रत्ननगरमा ज्येष्ठ नागरिकहरुका लागि कानुनी सचेतनासम्बन्धी अभिमुखीकरण

रत्ननगर, फागुन २७ । रत्ननगर नगरपालिका महिला, बालबालिका तथा ज्येष्ठ नागरिक शाखाको आयोजनामा ज्येष्ठ नागरिकहरुका लागि सेवासुविधा तथा कानुनी सचेतनासम्बन्धी अभिमुखीकरण कार्यक्रम सम्पन्न भएको छ ।

नगरस्तरीय ज्येष्ठ नागरिक समन्वय समितिका संयोजक छविलाल घिमिरेको अध्यक्षतामा भएको कार्यक्रममा प्रमुख प्रशासकीय अधिकृत सुकदेव लम्सालले ज्येष्ठ नागरिकलाई दिनुपर्ने सेवासुविधाका सन्दर्भमा नगरपालिकाले कुनै कन्जुस्याइँ नगरेको बताउँदै आफूले पाउनुपर्ने सेवासुविधा र अधिकार र कानुनका विषयमा सबै ज्येष्ठ नागरिकले चासो लिनुपर्ने बताए ।

कार्यक्रममा महिला, बालबालिका तथा ज्येष्ठ नागरिक शाखाका प्रमुख महिला विकास अधिकृत दीपा घिमिरेले नगरपालिकाले नगरस्तरीय ज्येष्ठ नागरिक समन्वय समितिसँग समन्वय गरी विभिन्न कार्यक्रम गर्दै आइरहेको र कानुनमा उल्लेख भएबमोजिम ज्येष्ठ नागरिकलाई सेवासुविधा प्रदान गरिरहेको बताइन् ।

अभिमुखीकरण कार्यक्रममा अधिवक्ता दिवाकर अर्यालले ऐन–२०६३, मुलुकी देवानी संहिता र नियमावली–२०६५ मा उल्लेख भएका कानुनका विषयमा ज्येष्ठ नागरिकहरुलाई प्रशिक्षण दिएका थिए । कार्यक्रममा पहिलो चरणमा रत्ननगर–१, २, ३, ४, ९, १०, ११ र १२ वडाका दस–दस जना गरी ८० जना ज्येष्ठ नागरिकको सहभागिता रहेको थियो ।

कार्यक्रममा सामाजिक विकास समितिका संयोजक बालकृष्ण चापागाईं, आर्थिक विकास समितिका संयोजक कलाधर पौडेल, रत्ननगर–१६ का वडाध्यक्ष हेमराज थापा, महिला विकास अधिकृत नानीमैया पौडेल, महिला विकास निरीक्षक रञ्जना पौडेललगायतको सहभागिता रहेको थियो ।