राष्ट्रिय एजेण्डामा अडिग रहने प्रतिबद्धता : ईश्वर पोखरेल

काठमाडौं ।

नेकपा एमालेका नेता तथा काठमाडौं निर्वाचन क्षेत्र नम्बर ५ का उम्मेदवार ईश्वर पोखरेलले राष्ट्रिय हितका मुद्दा र एजेण्डामा अडिग भएर उभिने स्पष्ट प्रतिबद्धता व्यक्त गरेका छन्।

आइतबार काठमाडौंमा सम्पन्न निर्वाचन परिचालन कमिटी घोषणा कार्यक्रममा सम्बोधन गर्दै पोखरेलले भ्रष्टाचार र अनियमिततासँग एमालेको कुनै सम्झौता नहुने स्पष्ट पारे। उनका अनुसार जो–कोही व्यक्ति अनियमित कार्यमा संलग्न देखिएमा उसले कानुनी दायराभित्र आएर सजाय भोग्नैपर्छ, पार्टी सदस्य भए वा नभए पनि।

“अनियमितता र भ्रष्टाचारमा संलग्न व्यक्ति एमाले हुनै सक्दैन,” पोखरेलले भने, “यदि कसैको संलग्नता प्रमाणित भयो भने कानुनअनुसार कारबाही हुन्छ, यही एमालेको स्पष्ट नीति हो।”

पोखरेलले आफूबाट पनि कुनै प्रकारको गैरकानुनी वा अनियमित काम नहुने दाबी गर्दै त्यस्तो अवस्था आए जनताले दिने जुनसुकै सजाय स्वीकार गर्न तयार रहेको बताए। उनले पारदर्शिता र जवाफदेहितालाई आफ्नो राजनीतिक आचरणको आधार बनाउने उल्लेख गरे।

उम्मेदवारी प्रक्रिया रहर वा भावनामा आधारित नहुने उल्लेख गर्दै उनले पार्टीको विधि, प्रक्रिया र मूल्य–मान्यताअनुसार मात्रै उम्मेदवार तय हुने बताए। “कसैलाई मन लाग्यो भनेर उम्मेदवार बन्ने व्यवस्था हुँदैन,” उनको भनाइ थियो।

त्यसैगरी उनले समाजमा जातीय सद्भाव बिगार्ने प्रयास भइरहेकोप्रति चिन्ता व्यक्त गर्दै त्यस्ता गतिविधिको एमाले दृढ रूपमा विरोधमा उभिने स्पष्ट पारे। राष्ट्रिय एकता र सामाजिक सहअस्तित्वको रक्षा पार्टीको प्राथमिकता रहने उनले बताए।