प्रयास असफल, रास्वपामा रविको स्पष्ट सन्देश

२६ पुस, काठमाडौं ।
राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच चलिरहेको एकता प्रयास अन्ततः निष्कर्षमा नपुग्ने संकेत देखिएको छ। यही सन्दर्भमा रास्वपा सभापति रवि लामिछानेले पार्टी सचिवालय बैठकमा पछिल्लो घटनाक्रमबारे स्पष्ट धारणा राखेका छन्।
भर्चुअल माध्यमबाट बसेको आकस्मिक बैठकमा रविले एकता प्रक्रियामा उत्पन्न अवरोध र त्यसको कारणबारे जानकारी गराउँदै अब थप अन्योलमा नबस्ने संकेत दिएका थिए। बैठक स्रोतका अनुसार, उज्यालो नेपाल पार्टीसँग भएको सहमति अनुमोदन नगर्ने निर्णय सचिवालयले गरेको छ।
एकता छलफलका क्रममा निरन्तर नयाँ शर्त र पद बाँडफाँडसम्बन्धी प्रस्ताव आउन थालेपछि प्रक्रिया जटिल बन्दै गएको र त्यसले विश्वासको वातावरण कमजोर बनाएको बैठकमा उठाइएको विषय थियो।
यस निर्णयमा पार्टीका वरिष्ठ नेता बालेन शाहसमेत सहमत रहेको स्रोतको दाबी छ।
एकता प्रक्रिया टुंगिएसँगै उज्यालो नेपाल पार्टीले पनि आन्तरिक छलफल तीव्र बनाएको छ। सो पार्टीले केन्द्रीय समितिको बैठक बोलाउनुका साथै कुलमान घिसिङलाई अध्यक्षको भूमिकामा अघि सारेको छ। बैठकपछि पत्रकार सम्मेलनमार्फत आधिकारिक धारणा सार्वजनिक गरिने तयारी रहेको बताइएको छ।
यसअघि भएको सहमतिअनुसार कुलमान घिसिङ रास्वपाको उपसभापति बन्ने चर्चा थियो। तर पदाधिकारी र केन्द्रीय समितिमा प्रतिनिधित्वको विषयमा अन्तिम सहमति जुट्न नसक्दा प्रक्रिया अवरुद्ध भएको जनाइएको छ।
समानुपातिक उम्मेदवार चयनको विषयमा पूर्व सहमति कार्यान्वयन नभएको उज्यालो नेपाल पार्टीको गुनासो रहँदै आएको छ भने रास्वपा पक्षले भने पछिल्ला संवादमा कुलमान पक्षले पहिलेको समझदारीबाट पछि हटेको आरोप लगाएको छ।