आगामी निर्वाचन स्वच्छ, निष्पक्ष र भयरहित बनाइने : निर्वाचन आयोग

काठमाडौं । निर्वाचन आयोग, नेपालले आगामी निर्वाचनलाई स्वच्छ, निष्पक्ष, स्वतन्त्र तथा भयरहित रूपमा सम्पन्न गर्न पूर्ण प्रतिबद्ध रहेको जनाएको छ।
आयोगले जारी गरेको विज्ञप्तिमा निर्वाचन आचारसंहिता सबै उम्मेदवार, राजनीतिक दल, मतदाता, सञ्चार माध्यम तथा सरोकारवाला निकायहरूले अनिवार्य रूपमा पालना गर्नुपर्ने उल्लेख गरिएको छ। आचारसंहिता उल्लङ्घन गर्ने जो–कोहीलाई प्रचलित कानून बमोजिम कारबाही गरिने आयोगले चेतावनी दिएको छ।
निर्वाचन आयोगले मतदाता महानुभावहरूलाई निर्वाचन प्रक्रियामा सक्रिय सहभागिता जनाउँदै आफ्नो अमूल्य मताधिकार प्रयोग गर्न आग्रह गरेको छ।
त्यस्तै, निर्वाचनसँग सम्बन्धित कुनै गुनासो, उजुरी वा थप जानकारी आवश्यक परेमा सम्बन्धित निर्वाचन कार्यालय वा आयोगका आधिकारिक माध्यममार्फत सम्पर्क गर्न सकिने आयोगले जनाएको छ।
निर्वाचनलाई मर्यादित, शान्तिपूर्ण र विश्वसनीय बनाउन जिल्ला प्रशासन कार्यालय, जिल्ला प्रहरी कार्यालय तथा जिल्ला निर्वाचन कार्यालय समेत परिचालन भइसकेका छन्।