जेन–जीका आवाजलाई राष्ट्रिय बहसमा ल्याउन गगन थापाको आग्रह

काठमाडौं ।
नेपाली कांग्रेसको दोस्रो विशेष महाधिवेशन नजिकिँदै गर्दा पार्टीका महामन्त्री गगनकुमार थापाले पछिल्लो समय जेन–जी आन्दोलनबाट उठिरहेका राष्ट्रिय सवालहरूलाई गम्भीर बहसको विषय बनाउनुपर्ने बताएका छन् । उनले यस्ता मुद्दाहरूलाई सामान्य चर्चा वा सामाजिक सञ्जालमै सीमित नराखी आम निर्वाचनअघि नै राष्ट्रिय स्तरमा छलफलको ढाँचामा लैजानुपर्ने धारणा राखेका हुन् ।
महामन्त्री थापाले सामाजिक सञ्जालमार्फत सार्वजनिक गरेको भिडियो सन्देशमा जेन–जी आन्दोलनले देखाएका असन्तुष्टि, अपेक्षा र सुझावहरूलाई राजनीतिक दल, विज्ञ तथा विभिन्न क्षेत्रका सरोकारवालाको सहभागितामा व्यवस्थित रूपमा छलफल गर्नुपर्ने आवश्यकता औंल्याएका छन् । उनका अनुसार युवा पुस्ताले उठाएका प्रश्नहरू देशको भविष्यसँग प्रत्यक्ष जोडिएका छन् ।
उनले चुनावअघि नै राष्ट्रिय मुद्दाहरूमा साझा बहस गरिनुपर्ने प्रस्तावमा प्रारम्भिक काम सुरू भइसकेको जानकारी पनि दिएका छन् । “यस विषयमा केही साथीहरूले पहल गरिसक्नुभएको छ,” उनले उल्लेख गरे, “अब यसलाई सबैको सहभागितामा अघि बढाउन मैले एउटा गुगल सिट फर्म सार्वजनिक गरेको छु।”
महामन्त्री थापाका अनुसार उक्त फर्ममार्फत आम नागरिकले आफ्ना विचार, सुझाव र प्राथमिकताका मुद्दाहरू राख्न सक्नेछन् । संकलित सुझावहरूलाई आगामी दिनमा राजनीतिक तथा बौद्धिक विमर्शको आधार बनाइने उनले बताएका छन् ।