गोडैता नगर Gen – Z संघर्ष समिती अध्यक्ष वेद प्रकाश झाको नेतृत्वमा गोडैता नगरमा ज्ञापनपत्र: १५ दिनभित्र माग सम्बोधन नभए कडा आन्दोलनको चेतावनी

गोडैता ।

गोडैता नगर Gen – Z संघर्ष समिती अध्यक्ष वेद प्र झाको नेतृत्वमा गोडैता नगर Gen-Z संघर्ष समितिले सोमबार गोडैता नगरपालिकामा विभिन्न जनचासोका विषय समेटिएको ज्ञापनपत्र बुझाएको छ। समितिले तोकिएको समयसीमाभित्र मागहरू कार्यान्वयन नगरे चरणबद्ध कडा आन्दोलनमा उत्रने चेतावनी दिएको छ।

समितिका अनुसार नगर क्षेत्रमा देखिएका सरसफाइ अभाव, स्वास्थ्य जोखिम, अव्यवस्थित पूर्वाधार, खानेपानी समस्या, सुरक्षा व्यवस्थामा कमजोरी तथा सार्वजनिक सम्पत्तिको संरक्षणमा लापरवाहीजस्ता मुद्दा तत्काल समाधान गर्नुपर्ने आवश्यकता औंल्याइएको छ।

समितिले अघि सारेका प्रमुख मागहरू:

१. नगर क्षेत्रभित्र नियमित र प्रभावकारी सरसफाइ प्रणाली कार्यान्वयन गरियोस्।
२. लामखुट्टे नियन्त्रण गरी कालाजार, मलेरिया लगायत संक्रामक रोगको जोखिम न्यूनीकरणका लागि ठोस कार्यक्रम सञ्चालन गरियोस्।
३. लक्ष्मिनिया पैनीमा ढल मिसाउने तथा अतिक्रमण गर्ने कार्य १५ दिनभित्र नियन्त्रण तथा व्यवस्थापन गरियोस्।
४. वेनी बोला उच्च माध्यमिक विद्यालय र जानकीनगर टोलमा निर्माणाधीन खानेपानी टंकी शीघ्र सम्पन्न गरी वितरण प्रणाली व्यवस्थित बनाइयोस्।
५. गोडैता बजार क्षेत्रमा जडान गरिएका CCTV क्यामेरा तथा सडक बत्ती ५ दिनभित्र सञ्चालनमा ल्याइ सुरक्षा व्यवस्था सुदृढ गरियोस्।
६. वर्षायाममा हुने हिलो तथा अव्यवस्थालाई न्यूनीकरण गर्न तरकारी बजार र कपडा बजारको स्तरोन्नति तथा पूर्वाधार विकास गरियोस्।
७. पाठशाला तथा बानिया कुट्टी मठ परिसरस्थित पोखरीमा भइरहेको प्रदूषण तथा अवैध गतिविधि ५ दिनभित्र रोक्दै संरक्षण र सौन्दर्यकरण गरियोस्।
८. नगरका सबै क्षेत्रमा प्रभावकारी मोबाइल नेटवर्क सेवा सुनिश्चित गर्न सम्बन्धित निकायसँग समन्वय गरियोस्।
९. वडा नं. ७ स्थित गणेश मन्दिर अगाडिको अतिक्रमित सरकारी जग्गा खाली गराई सार्वजनिक खेल मैदानको रूपमा विकास गरियोस्।
१०. नगरस्तरीय वातावरण संरक्षणसम्बन्धी कार्यक्रमहरूलाई प्रभावकारी र परिणाममुखी बनाइयोस्।

समितिले स्पष्ट पारेको छ कि उल्लिखित मागहरू निर्धारित समयभित्र सम्बोधन नभए नागरिक सहभागितासहित चरणबद्ध आन्दोलनका कार्यक्रम सार्वजनिक गरिनेछ, जसको सम्पूर्ण जिम्मेवारी सम्बन्धित निकायले वहन गर्नुपर्नेछ।