मकवानपुरको भीमफेदीमा टाटा सुमो दुर्घटना हुँदा ६ जनाको मृत्यु, ३ जना घाइते

वीरगञ्ज । मकवानपुरको भीमफेदी गाउँपालिका–६ जुरीखेतमा आइतबार साँझ भएको यात्रुवाहक टाटा सुमो (जिप) दुर्घटनामा परी ६ जनाको मृत्यु भएको छ भने ३ जना घाइते भएका छन् ।

काठमाडौँबाट हेटौँडातर्फ आउँदै गरेको ना १ ज १७७८ नम्बरको टाटा सुमो भीमफेदी–कुलेखानी–काठमाडौँ सडक खण्डअन्तर्गत जुरीखेतमा सडकबाट करिब १०० मिटर तल खोल्सामा खसेर दुर्घटना भएको हो । गाडीमा ६ जना पुरुष, १ महिला, १ बालक र १ बालिकासहित कुल ९ जना सवार थिए ।

जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक (डिएसपी) पुष्कर बोगटीका अनुसार दुर्घटनामा घाइते भएका ९ जनालाई तत्काल उद्धार गरी हेटौँडा अस्पताल पुर्‍याइएको थियो । तर, उपचारका क्रममा ६ जनाको मृत्यु भएको छ । बाँकी ३ जनाको हेटौँडा अस्पतालमा उपचार भइरहेको छ । घाइतेमध्ये दुई जनाको अवस्था मध्यम रहेको अस्पताल स्रोतले जनाएको छ ।

मृतकहरूको अझैसम्म पहिचान (सनाखत) हुन बाँकी रहेको प्रहरीले बताएको छ । मृतकका शवहरू हेटौँडा ल्याइएका छन् ।

इलाका प्रहरी कार्यालय भीमफेदीबाट खटिएको प्रहरी टोलीले घटनास्थलबाट घाइते र मृतकको उद्धार गरेको थियो । दुर्घटनाको कारणबारे प्रहरीले अनुसन्धान सुरु गरेको जनाइएको छ ।

स्थानीयवासीहरूका अनुसार यो सडक खण्ड जोखिमपूर्ण रहेको र यसअघि पनि यस्ता दुर्घटना हुँदै आएका छन् । घटनाले स्थानीयमा शोकको वातावरण छाएको छ ।