सर्लाही–२ मा नेकपाको निर्वाचन समीक्षा बैठक सम्पन्न

मलंगवा, सर्लाही – प्रतिनिधि सभा सदस्य निर्वाचन क्षेत्र नं. २ सर्लाहीमा नेपाली कम्युनिस्ट पार्टी (नेकपा)द्वारा आयोजित निर्वाचन समीक्षा बैठक मंगलबार सम्पन्न भएको छ। बैठक निर्वाचन परिचालन समितिको मलंगवा कार्यालयमा आयोजित गरिएको थियो।

बैठकमा नेकपाका केन्द्रीय सदस्य तथा सो क्षेत्रबाट उम्मेदवार रहेका महेन्द्र राय यादवले फागुन २१ गते सम्पन्न प्रतिनिधि सभा सदस्य निर्वाचनको मत परिणाम, चुनावी अभियान र संगठनात्मक गतिविधिबारे विस्तृत समीक्षा प्रस्तुत गरेका थिए।

उनले आगामी दिनमा पार्टी संगठनलाई अझ सुदृढ बनाउने र जनतासँगको सम्बन्ध बलियो पार्ने विषयमा छलफल भएको जानकारी दिएका छन्। बैठकले निर्वाचनबाट प्राप्त अनुभवलाई आत्मसात गर्दै आगामी राजनीतिक कार्यक्रमलाई प्रभावकारी ढंगले अघि बढाउने निर्णय पनि गरेको छ।

बैठकमा निर्वाचन क्षेत्रभित्रका पार्टीका नेता, पालिका र वडा स्तरका संयोजक तथा कार्यकर्ताको उपस्थित रहेको थियो।

निर्वाचन नतिजाअनुसार, राष्ट्रिय स्वतन्त्र पार्टीका उम्मेदवार रविन महतोले ४२,५१२ मत प्राप्त गर्दै विजयी भएका छन् भने नेकपाका उम्मेदवार महेन्द्र राय यादवले ८,५२३ मत प्राप्त गरी निकटतम प्रतिस्पर्धी बनेका छन्।