पशुपतिनाथमा हर्क साम्पाङको श्रमदान, मन–तन–वातावरण सरसफाइमा जोड

काठमाडौं, ५ वैशाख — श्रम संस्कृति पार्टीका अध्यक्ष तथा प्रतिनिधिसभा सदस्य हर्कराज राई (साम्पाङ) को उपस्थितिमा शनिबार पशुपतिनाथ मन्दिर परिसरमा श्रमदान कार्यक्रम सम्पन्न भएको छ। कार्यक्रममा सरसफाइसँगै विभिन्न श्रमजन्य कामहरू गरिएको जनाइएको छ।

कार्यक्रमलाई सम्बोधन गर्दै साम्पाङले देशमा सरसफाइलाई तीन तहमा बुझ्नुपर्ने धारणा राख्दै मन, तन र वातावरणको सरसफाइ अपरिहार्य रहेको बताए। उनले सबै नागरिकलाई तीनै क्षेत्रमा सक्रिय भएर योगदान दिन आह्वान गरे।

‘हामीले सरसफाइ गर्नुपर्छ। सरसफाइ यो देशमा तीन खालको छ– मन, तन र वातावरणको। यी तीनवटै तहका व्यक्ति वा निकायहरू सरसफाइमा लाग्नुपर्छ,’ साम्पाङले भने।

श्रमदान कार्यक्रममा सहभागी टोलीले पशुपति क्षेत्रमा सरसफाइसँगै आवश्यक श्रमजन्य कामहरू सम्पन्न गरेको जनाएको छ। कार्यक्रमले श्रम, स्वच्छता र सामाजिक उत्तरदायित्वप्रति जनचेतना अभिवृद्धि गर्ने विश्वास लिइएको छ।