दक्षिण एसियाकै उत्कृष्ट सदन बनेको दाबी, अब अभ्यास र सिद्धान्तको पालो : सांसद मनिष झा

काठमाडौं । राष्ट्रिय स्वतन्त्र पार्टी (रास्वपा)का सांसद मनिष झाले वर्तमान प्रतिनिधिसभालाई दक्षिण एसियाकै उत्कृष्ट सदनको संज्ञा दिएका छन्।

सोमबार बसेको प्रतिनिधिसभा बैठकमा बोल्दै उनले रास्वपाले चुनावमा जाँदा केवल मत माग्ने उद्देश्य नभई दक्षिण एसियाकै उत्कृष्ट संसद् निर्माण गर्ने परिकल्पनासहित अघि बढेको उल्लेख गरे। उनले अहिलेको सदनको अवस्थाले त्यो परिकल्पना पूरा भएको महसुस भएको बताए।

उनले भने, “हामीले चुनावका बेला मतदातालाई भनेका थियौं– हामी केवल मत माग्न आएका होइनौं, दक्षिण एसियाको उत्कृष्ट प्रतिनिधिसभा बनाउने लक्ष्यसहित चुनावमा होमिएका हौं। आज सदनमा सहकर्मीहरूलाई हेर्दा त्यो परिकल्पना पूरा भएको देखिन्छ।”

सांसद झाले अब सदनलाई अझ प्रभावकारी बनाउन अभ्यास, राजनीतिक संस्कृति र सिद्धान्तमा आधारित कार्यशैली आवश्यक रहेको बताए।

त्यस्तै, उनले विगतमा संसद् खुमलटार, बालुवाटार, बुढानिलकण्ठ र बालकोटका प्रभावमा सञ्चालन हुने गरेको स्मरण गर्दै अब सदन स्वतन्त्र रूपमा सिद्धान्तका आधारमा अघि बढ्नुपर्ने धारणा राखे।

सत्ता पक्ष बलियो हुँदै जाँदा दम्भ प्रदर्शन गर्नुको साटो उदारता, संस्कार र सिद्धान्त देखाउनुपर्ने उनको जोड थियो।