सशक्त प्रतिपक्ष बन्न ओलीको निर्देशन

काठमाडौं, १२ चैत । केपी शर्मा ओली ले आफ्ना पार्टीका सांसदहरूलाई संसदमा सशक्त प्रतिपक्षको भूमिका निर्वाह गर्न निर्देशन दिएका छन्।

प्रतिनिधिसभाका नवनिर्वाचित सांसदहरूले शपथ लिएलगत्तै ललितपुरको च्यासलस्थित पार्टी केन्द्रीय कार्यालयमा बसेको प्रतिनिधिसभा र राष्ट्रियसभाका सांसदहरूको संयुक्त बैठकलाई सम्बोधन गर्दै उनले यस्तो निर्देशन दिएका हुन्।

ओलीले संसदमा प्रभावकारी र सक्रिय भूमिका खेल्नुपर्ने बताउँदै सरकारले कमीकमजोरी गरेमा स्पष्ट रूपमा खबरदारी र आलोचना गर्नुपर्ने धारणा राखे। उनले विरोध तथ्य, प्रमाण र पुराना नजिरका आधारमा गर्नुपर्नेमा जोड दिए।

उनले सांसदहरूलाई अध्ययनशील भएर प्रस्तुत हुन आग्रह गर्दै गलत प्रस्तावहरूको तथ्ययुक्त ढङ्गले खण्डन गर्न सक्नुपर्ने बताए।

अध्यक्ष ओलीले निर्वाचन परिणामबाट हरेश नखान आग्रह गर्दै देश र जनताको पक्षमा दृढतापूर्वक काम गर्न निर्देशन दिए। उनले पार्टीले असक्षमता वा सुशासनविरुद्धका कामका कारण नभई अन्य राजनीतिक परिस्थितिका कारण यस्तो परिणाम आएको दाबी गरे।

यसैबीच उनले वर्तमान राजनीतिक अवस्थाबारे टिप्पणी गर्दै केही शक्तिहरूको सफलता अस्थायी हुन सक्ने संकेत गरे।