मित्रश्री विद्यालयलाई डाइनामिक कप स्केटिङ उपाधि

भक्तपुर ।
भक्तपुरकोगुण्डुस्थित काठमाडौं वर्ल्ड स्कुलमा शनिबार सम्पन्न प्रथम डाइनामिक कप इनलाइन स्केटिङ स्पीड च्याम्पियन  सिप मा मित्रश्री विद्यालयले उपाधि जितेको छ। प्रतिस्पर्धामा जनप्रेमी विद्यालय दोस्रो र शिवर्ड विद्यालय तेस्रो स्थानमा रहे।

जुनियर तथा सिनियर विधामा आयोजना गरिएको प्रतियोगितामा तीन विद्यालयका करिब २५० खेलाडीले सहभागिता जनाएका थिए। ३ सय मिटर दूरीका महिला र पुरुषतर्फ ६–६ खेल समावेश गरिएको थियो।

प्रतियोगितामा ६–८, ८–१०, १०–१२, १२–१४, १४–१६ र १६–१८ वर्ष उमेर समूहका खेलाडीबीच प्रतिस्पर्धा भएको थियो। उत्कृष्ट प्रदर्शन गर्ने ३६ खेलाडीले प्रथम, द्वितीय र तृतीय स्थान हासिल गर्दै मेडल तथा प्रमाणपत्र प्राप्त गरेका छन्।

प्रतियोगिता डाइनामिक स्केट क्लब भक्तपुर र नेपाल स्केटिङ तथा स्केटबोर्डिङ एसोसिएसनको संयुक्त आयोजनामा सम्पन्न भएको हो।

कार्यक्रमका प्रमुख अतिथि राष्ट्रिय खेलकुद परिषद्का पूर्व सदस्य–सचिव टंकलाल घिसिङले स्केटिङ खेल नेपालमा दिनदिनै लोकप्रिय बन्दै गएको बताए। उनले उचित प्रशिक्षण र अवसर पाएमा नेपाली खेलाडीहरूले भविष्यमा ओलम्पिकसम्म पुग्न सक्ने सम्भावना रहेको उल्लेख गर्दै खेलको विकासमा विद्यार्थी र अभिभावकले विशेष ध्यान दिनुपर्ने बताए

क्लबका अध्यक्ष रोजन भासिमाको सभापतित्वमा भएको कार्यक्रममा प्रमुख प्रशिक्षक दिलिपराज बराल, संघका अध्यक्ष अच्युत खनाल, महासचिव सत्य थापा, सल्लाहकार सौनक भट्ट, स्केटका ब्रान्ड एम्बास्डर सञ्जु श्रेष्ठ, रोलर हक्की टोलीका व्यवस्थापक सावी डिसी तथा काठमाडौं वर्ल्ड स्कुलका वरिष्ठ निर्देशक डा. विद्या अधिकारी लगायतले विजेता खेलाडीलाई मेडल, ट्रफी र प्रमाणपत्र प्रदान गरेका थिए।