ओली र लेखकको बन्दीप्रत्यक्षीकरण रिटमा आज पनि सुनुवाइ हुँदै

२३ चैत, काठमाडौं ।

केपी शर्मा ओली र रमेश लेखकको बन्दीप्रत्यक्षीकरण रिटमाथि आज पनि सुनुवाइ हुने भएको छ।

आजको सुनुवाइमा महान्यायाधिवक्ता कार्यालयका तर्फबाट सरकारी वकिलले बहस गर्नेछन्। यसअघि आइतबार सर्वोच्च अदालतका न्यायाधीश विनोद शर्मा र न्यायाधीश सुनिलकुमार पोखरेलको इजलासमा सुनुवाइ भएको थियो, जहाँ ओली र लेखकका तर्फबाट कानुन व्यवसायीहरूको बहस सम्पन्न भइसकेको छ।

ओली र लेखकलाई प्रहरीले चैत १४ गते पक्राउ गरेको थियो। उनीहरूलाई भदौ २३ र २४ गतेको जेनजी आन्दोलनसँग सम्बन्धित घटनामा अनुसन्धानका लागि नियन्त्रणमा लिइएको हो।

यसैबीच, ओलीकी पत्नी राधिका शाक्य र लेखककी पत्नी यशोदा लेखकले सरकारले गैरकानुनी रूपमा थुनामा राखेको आरोप लगाउँदै थुनामुक्त गर्न माग गर्दै चैत १५ गते बन्दीप्रत्यक्षीकरणको रिट निवेदन दायर गरेका थिए।