पूर्वराष्ट्रपति भण्डारीद्वारा कार्की आयोग प्रतिवेदन कार्यान्वयन

 निर्णयप्रति आपत्ति

काठमाडौँ । विद्यादेवी भण्डारी ले सरकारले गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्ने निर्णयप्रति गम्भीर ध्यानाकर्षण भएको बताउनुभएको छ।

आइतबार जारी प्रेस विज्ञप्तिमार्फत भण्डारीले भदौ २३ र २४ गतेका घटनासम्बन्धी उक्त प्रतिवेदन पूर्ण अध्ययन नगरी कार्यान्वयन गर्ने निर्णय हतारमा गरिएको टिप्पणी गर्नुभएको हो। उहाँले यस्तो संवेदनशील विषयमा गरिएको निर्णय वर्तमान संविधान, प्रचलित कानुन तथा स्थापित लोकतान्त्रिक अभ्याससँग मेल नखाने उल्लेख गर्नुभएको छ।

भण्डारीले प्रतिवेदन कार्यान्वयन गर्दा विधिसम्मत प्रक्रिया, पर्याप्त अध्ययन तथा संस्थागत परामर्श आवश्यक पर्ने बताउँदै हतारमा गरिएका निर्णयले विधिको शासनप्रति जनविश्वास कमजोर हुन सक्ने चेतावनी दिनुभएको छ।

उहाँले सुशासनलाई मुख्य एजेन्डा बनाएको सरकारले अपरिपक्व कदम चाल्नु दुःखद भएको उल्लेख गर्दै लोकतान्त्रिक मूल्य, मान्यता र संवैधानिक मर्यादाको सम्मान गर्दै उक्त निर्णय पुनर्विचार गर्न आग्रह गर्नुभएको छ।

साथै, सरकारलाई संयमता अपनाउँदै विधि र प्रक्रियाअनुसार अघि बढ्न तथा मुलुकको स्थायित्व र लोकतान्त्रिक प्रणालीको संरक्षणतर्फ गम्भीर हुन पनि उहाँले आग्रह गर्नुभएको छ।