राष्ट्रिय सभा कार्यव्यवस्था परामर्श समितिको बैठक सम्पन्न, २० औँ अधिवेशनको तयारीमा छलफल

काठमाडौँ, १८ चैत – राष्ट्रिय सभा कार्यव्यवस्था परामर्श समितिको बैठक सिंहदरबारस्थित अध्यक्षको कार्यकक्षमा सम्पन्न भएको छ। बैठकको अध्यक्षता अध्यक्ष नारायण प्रसाद दाहालले गरेका थिए।

बैठकले भोलिदेखि सुरु हुने राष्ट्रिय सभाको २० औँ अधिवेशनको पूर्वतयारीबारे व्यापक छलफल गरेको छ। यस क्रममा राष्ट्रिय सभा उपाध्यक्ष र सभापतिको निर्वाचन, नवनिर्वाचित सदस्यहरूको विभिन्न समितिमा विभाजन, सभाको आगामी बैठकको कार्यसूची, बैठक कक्षको सीट योजना तथा प्रस्तावित कार्यतालिकाका विषयमा निर्णयात्मक छलफल भएको समितिले जनाएको छ।

कार्यव्यवस्था परामर्श समितिको एजेन्डामा सदस्यहरूको मनोनयन, सभामा अध्यक्षता गर्ने सदस्यहरूको चयन, उपाध्यक्ष र सभापतिको निर्वाचन प्रक्रिया लगायतका विषयहरू समेटिएका थिए। साथै, विभिन्न दलका नेताहरूलाई शुभकामना मन्तव्य राख्नका लागि समय निर्धारण गर्ने विषयमा पनि छलफल गरिएको थियो। बैठकमा अन्य विविध विषयहरूमा समेत विचार आदान–प्रदान गरिएको थियो।

बैठकलाई सम्बोधन गर्दै अध्यक्ष दाहालले राष्ट्रिय सभाको २० औँ अधिवेशन सफल बनाउन सबै राजनीतिक दलहरूको सक्रिय सहभागिता र रचनात्मक भूमिकाको आवश्यकता औंल्याए। उनले सहकार्य र सहजीकरणका लागि सबै पक्षलाई आग्रह गरे।

बैठकमा कानुन, न्याय तथा संसदीय मामिला मन्त्री सोविता गौतम, कार्यव्यवस्था परामर्श समितिका सदस्यहरू, संघीय संसदका महासचिव र राष्ट्रिय सभाका सचिवको समेत उपस्थिति रहेको थियो।