नेपाल विद्युत प्राधिकरणको सूचना : यी क्षेत्रमा केही दिन बिजुली जाने
- २१ माघ, काठमाडौं ।
- काठमाडौँ उपत्यकाका विभिन्न क्षेत्रमा आजदेखि विद्युत सेवा अवरुद्ध हुने भएको छ ।
२१ माघ, काठमाडौं ।
काठमाडौँ उपत्यकाका विभिन्न क्षेत्रमा आजदेखि विद्युत सेवा अवरुद्ध हुने भएको छ । नेपाल विद्युत प्राधिकरणले वितरण लाइन भूमिगत गर्ने कार्यका लागि फरक–फरक दिन विभिन्न क्षेत्रमा विद्युत सेवा बन्द गर्न लागेको जनाएको हो ।
प्राधिकरणले सूचना जारी गर्दै आजदेखि माघ २९ गतेसम्म बिहान ११ बजेदेखि अपराह्न ४ बजेसम्म विद्युत सेवा अवरुद्ध हुने जानकारी दिएको छ । कुलेश्वर, बानेश्वर, जोरपाटी र कीर्तिपुर वितरण केन्द्रअन्तर्गतका विद्युतीय लाइन भूमिगत गर्ने कार्यका लागि सेवा प्रभावित हुने बताइएको छ ।
प्राधिकरणका अनुसार आज टंगाल वितरण केन्द्रअन्तर्गत भत्केको पुल क्षेत्र, मंगलबार कलंकी फिडरअन्तर्गत कलंकी मालपोत कार्यालय आसपास, बुधबार बालकुमारी, इमाडोल तथा लुभु क्षेत्रमा विद्युत सेवा अवरुद्ध हुनेछ ।
यस्तै बिहीबार नैकापदेखि बलम्बुसम्म, २५ गते शुक्रबार बल्खु चोकदेखि चोभार गेटसम्म, २७ गते बाबा चोकदेखि क्रिकेट स्टेडियमसम्म, २८ गते गोशाला चोकदेखि पुरानो बानेश्वरसम्म तथा २९ गते रोतोपुलदेखि गौशालासम्मका क्षेत्रमा विद्युत आपूर्ति बन्द हुने प्राधिकरणले जनाएको छ ।
प्राधिकरणले लाइन भूमिगत गर्ने कार्यलाई तीव्रता दिन अस्थायी रूपमा सेवा अवरुद्ध गर्न लागिएको भन्दै सेवाग्राहीलाई आवश्यक तयारी गर्न अनुरोध गरेको छ ।
प्रतिक्रिया
यो पनि पढौँ
यो पनि पढौँ
