सुर्खेतमा १६ वर्षीया इनिशा विक बलात्कारपछि हत्या, प्रहरीले निष्कर्ष सार्वजनिक

सुर्खेत, २८ फाल्गुन – सुर्खेत गुर्भाकोटकी १६ वर्षीया इनिशा विक सामुदायिक जंगलमा मृत अवस्थामा फेला परेकी छन्। पोस्टमार्टम र अनुसन्धानबाट प्रहरीले बलात्कारपछि हत्या भएको निष्कर्ष निकालेको छ।

जिल्ला प्रहरी कार्यालय सुर्खेतका प्रवक्ता डीएसपी मोहनजंग बुढथापाका अनुसार, फागुन २३ र २४ गते चार जनालाई पक्राउ गरी अनुसन्धान सुरु गरिएको छ। पोस्टमार्टम रिपोर्टमा मृतकको संवेदनशील अंगमा घाउ र अत्यधिक रक्तस्राव देखिएको छ, जसका कारण उनको मृत्यु भएको हुनसक्ने प्रहरीको अनुमान छ।

प्रहरीका अनुसार, पक्राउ परेकाहरूको बयान लिइरहेको छ। प्रारम्भिक अनुसन्धानले देखाएको छ कि मृतक र पक्राउ परेका चारजना मध्ये एकजना लामो समयदेखि प्रेम सम्बन्धमा रहेको बुझिएको छ।

पोस्टमार्टम रिपोर्ट कर्णाली प्रदेश अस्पताल, काला गाउँका तीन चिकित्सक र भेरी अस्पताल, बाँकेका फोरेन्सिक विशेषज्ञ डा. अर्विन शाक्यले तयार पारेका हुन्। डा. शाक्यका अनुसार, जबरजस्ती करणीपछि मृतकको संवेदनशील अंग च्यातिएको र अत्यधिक रक्तस्राव हुँदा मृत्यु भएको देखिएको छ।

फागुन २३ गते बिहान घरबाट निस्किएकी इनिशा दिउँसोसम्म घर नफर्किएपछि परिवारले खोजी थालेका थिए। उनी वीरेन्द्रनगर–४ स्थित शहीद पार्क नजिकैको जनजागरण सामुदायिक वनमा बेहोस अवस्थामा फेला परिन्। घटनास्थलबाटै प्रहरीले एक युवकलाई नियन्त्रणमा लिएको थियो।

इनिशा वीरेन्द्रनगर–६ स्थित उषा बालबाटिका विद्यालयमा कक्षा ११ की छात्रा थिइन्। घटनास्थलमा उनका रक्ताम्मे शरीर, लुछिएको कपाल, घाँस मडारिएको र अलग–अलग स्थानमा जुत्ता र मोजा भेटिएको थियो।

उनका आफन्तले दोषीको कडा कारबाही र पीडित परिवारको न्याय सुनिश्चित गर्न सरकारसँग माग राखेका छन्। प्रहरीले घटनामा संलग्न भएको आशंकामा चारजना १८ वर्षमुनिका नाबालकलाई नियन्त्रणमा लिएर थप अनुसन्धान गरिरहेको छ।