शहीदको बलिदानलाई बेवास्ता गर्न नहुने बालेन शाहको भनाइ

राष्ट्रिय स्वतन्त्र पार्टीका वरिष्ठ नेता बालेन शाहले शहीदहरूको बलिदानलाई कहिल्यै नजरअन्दाज गर्न नहुने बताएका छन्। शहीद दिवसको अवसर पारेर सामाजिक सञ्जालमा सन्देश सार्वजनिक गर्दै उनले शहीदहरूको त्यागले आजको राजनीतिक चेतनाको जग बसाएको उल्लेख गरेका हुन्।

उनले राणा शासनविरुद्ध संघर्ष गरेका गङ्गालाल श्रेष्ठ, दशरथ चन्द, धर्मभक्त माथेमा र शुक्रराज शास्त्रीको बलिदान स्मरण गर्दै भनेका छन् कि ती महान् शहीदहरूको क्रूर हत्या भएको दशकौँ बितिसक्दा पनि राज्य साँचो अर्थमा जनताको हुन नसकेको यथार्थ अझै कायम छ। व्यवस्था पटक–पटक परिवर्तन भए पनि सत्ताको चरित्र नबदलेको उनको टिप्पणी छ।

शाहले हालका वर्षहरूमा पनि सुशासन र भ्रष्टाचार अन्त्यको माग गर्दै शान्तिपूर्ण आन्दोलनमा उत्रिएका युवाहरूले जीवन गुमाउनुपरेको घटनाप्रति दुःख व्यक्त गरेका छन्। उनले अब ती शहीदहरूले देखेका सपना साकार पार्ने दिशामा अघि बढ्नुपर्ने आवश्यकता औँल्याएका छन्।

दीर्घकालदेखि मौलाएको भ्रष्टाचार अन्त्य गर्दै सुशासन स्थापना गर्नु र देशलाई आर्थिक रूपमा सबल बनाउनु आजको प्रमुख जिम्मेवारी भएको शाहको भनाइ छ। साथै, राज्यका निकायहरूमा देखिएको चरम दलीयकरण अन्त्य गरी राज्यलाई जवाफदेही र पारदर्शी बनाउनु अपरिहार्य रहेको उनले बताएका छन्।

अब शहीदको रगतको सम्मान गर्दै उनीहरूको सपना पूरा गर्ने समय आएको भन्दै शाहले सुशासनयुक्त र भ्रष्टाचारमुक्त नेपाल निर्माणको संकल्प दोहोर्‍याएका छन्। भविष्यमा कसैले पनि शहीद बन्न नपरोस् भन्ने कामनासहित उनले सम्पूर्ण शहीदहरूप्रति भावपूर्ण श्रद्धाञ्जली अर्पण गरेका छन्।