सर्लाहीमा टाउको विनाको अवस्थामा वन चौकीदारको शव फेला, अनुसन्धान जारी

२१ पुस, मलङ्गवा।
सर्लाहीको ईश्वरपुर नगरपालिका–२ राईटरखोरस्थित सागरनाथ वन विकास परियोजनाको जंगलभित्र एक जना वन चौकीदारको शव टाउको अलग भएको अवस्थामा फेला परेको छ।

जंगलमा ज्यालादारीमा कार्यरत राईटरखोरकै ४७ वर्षीय रामईश्वर महतोको शव घरदेखि करिब पाँच सय मिटर टाढा जंगलभित्र भेटिएको सर्लाही प्रहरीले जनाएको छ। महतो बिहानदेखि सम्पर्कविहीन थिए भने मोबाइल फोन पनि बन्द अवस्थामा रहेको बताइएको छ।

स्थानीयका अनुसार बिहान करिब ५ बजेतिर जंगलभित्र रूख काटिएको आवाज सुन्ने केही व्यक्ति त्यस क्षेत्रमा पुगेका थिए। दिउँसोसम्म पनि महतो घर नफर्किएपछि परिवार तथा स्थानीयले खोजी थालेका थिए।

खोजीक्रममा महतोको शव टाउको अलग भएको अवस्थामा भेटिएको हो। हालसम्म टाउको फेला नपरेको र खोजी कार्य जारी रहेको सर्लाही प्रहरी प्रवक्ता डीएसपी सरोज राईले जानकारी दिए। घटनास्थलमा शवको मुचुल्का उठाउने प्रक्रिया भइरहेको छ।

घटनाको प्रकृति गम्भीर रहेकाले प्रहरीले धनुषाको लालगढबाट तालिमप्राप्त कुकुर झिकाई विस्तृत अनुसन्धान सुरु गरेको जनाएको छ। घटनाको कारण र संलग्न व्यक्तिबारे अनुसन्धान भइरहेको प्रहरीले बताएको छ।