एमाले अध्यक्ष ओलीले स्वीकारे मत परिणाम, जनताको निर्णयलाई दियो सम्मान

काठमाडौं, २८ फागुन – नेकपा एमालेका अध्यक्ष केपी शर्मा ओलीले हालै सम्पन्न निर्वाचनमा आफ्नो पार्टीले अपेक्षित परिणाम हासिल गर्न नसकेको स्वीकार गरेका छन्। बिहीबार सामाजिक सञ्जालमार्फत उनले जनताको मतलाई पूर्ण सम्मानका साथ स्वीकार गर्ने प्रतिबद्धता व्यक्त गरेका हुन्।

ओलीले झापा ५ मा रास्वपाका वरिष्ठ नेता बालेन्द्र शाहसँग पराजित भएको कुरा स्वीकार गर्दै भने,
“यस पटकको निर्वाचनमा मैले अपेक्षा गरेजस्तो परिणाम प्राप्त गर्न सकिनँ। हाम्रो पार्टीले पनि अपेक्षित परिणाम ल्याउन सकेन। लोकतन्त्रमा अन्तिम फैसला जनताकै हुन्छ, र त्यो फैसला शिरोधार्य गर्नु म र मेरो पार्टीको कर्तव्य हो।”

अध्यक्ष ओलीले आफ्नो पक्षमा मतदान गर्न पुगेका सबै मतदाता, नेता, कार्यकर्ता, स्वयंसेवक र शुभेच्छुकप्रति कृतज्ञता व्यक्त गरेका छन्। उनले भने,
“तपाईंहरूको विश्वास नै हाम्रो शक्ति हो। तपाईंहरूको साथ नै हाम्रो ताकत हो।”

ओलीले निर्वाचनको नतिजाले पार्टीको प्रतिबद्धता र सेवाभावलाई कमजोर बनाएको नभएको स्पष्ट पार्दै भने,
“हामी जनताकै बीचमा रहनेछौँ, जनताकै लागि काम गरिरहनेछौँ, र विश्वासको यो सम्बन्धलाई अझ बलियो बनाउँदै अघि बढ्नेछौँ। मत दिनुहुने, साथ दिनुहुने, विश्वास राख्नुहुने सबैमा हृदयदेखि धन्यवाद।”