६३ राजनीतिक दलका ३ हजार २१३ समानुपातिक उम्मेदवारको बन्दसूची सार्वजनिक

काठमाडौं, ४ माघ । निर्वाचन आयोगले प्रतिनिधिसभा निर्वाचनका लागि समानुपातिक प्रणालीतर्फ उम्मेदवारहरूको बन्दसूची सार्वजनिक गरेको छ।
आयोगका सहसचिव तथा प्रवक्ता नारायणप्रसाद भट्टराईका अनुसार विभिन्न राजनीतिक दलले पेश गरेका समानुपातिक उम्मेदवारहरूको सूची आज औपचारिक रूपमा सार्वजनिक गरिएको हो।
सार्वजनिक विवरण अनुसार ५७ वटा निर्वाचन चिन्हअन्तर्गत ६३ राजनीतिक दलबाट जम्मा ३ हजार २१३ जना उम्मेदवारको नाम बन्दसूचीमा समावेश गरिएको छ। ती दलहरूले गत पुस १३ र १४ गते समानुपातिक उम्मेदवारको सूची निर्वाचन आयोगमा बुझाएका थिए।
आयोगले सार्वजनिक गरेको बन्दसूचीमा समावेश उम्मेदवारको योग्यतासम्बन्धी दाबी–विरोध गर्न चाहने मतदाताले माघ १० गतेभित्र सम्बन्धित निर्वाचन अधिकृतको कार्यालयमा निवेदन दिन सक्ने व्यवस्था गरिएको छ।
दाबी–विरोध प्रक्रिया समानुपातिक निर्वाचन प्रणालीतर्फको निर्वाचन अधिकृतको कार्यालयमा उपस्थित भई गर्नुपर्ने आयोगले जनाएको छ।
यसैबीच, प्रतिनिधिसभा निर्वाचनअन्तर्गत प्रत्यक्षतर्फको मनोनयन आगामी मंगलबार हुने कार्यक्रम रहेको छ। प्रतिनिधिसभा निर्वाचन फागुन २१ गते हुने तय भएको छ, जसअन्तर्गत समानुपातिक प्रणालीबाट ११० जना र प्रत्यक्ष प्रणालीबाट १६५ जना सांसद निर्वाचित हुनेछन्।