बलरा–६ मिर्जापुरमा भीषण आगलागी, पशुचौपाया र २० क्विन्टल धान जलेर नष्ट

सर्लाही । सर्लाही जिल्लाको बलरा नगरपालिका–६ मिर्जापुर गाउँमा आइतबार नन्दु शाहको घरमा भीषण आगलागी हुँदा ठूलो धनमालको क्षति भएको छ। आगलागीबाट घरमा बाँधिएका भैँसी, पारा तथा बाख्राहरू जलेर मरेका छन् भने करिब २० क्विन्टल धान पूर्ण रूपमा जलेर नष्ट भएको छ।
अचानक लागेको आगोले केही समयमै घर र गोठलाई आफ्नो चपेटामा लिँदा पीडित परिवारको दैनिक जीविकोपार्जनमा ठूलो असर परेको छ। आगलागीको कारण हालसम्म खुल्न सकेको छैन। स्थानीय बासिन्दा तथा जनप्रतिनिधिको सहयोगमा आगो नियन्त्रणमा लिइएको भए पनि क्षति भने ठूलो भएको छ।
घटनापछि पीडित परिवारलाई तत्काल राहत, उचित क्षतिपूर्ति तथा पुनःस्थापनाका लागि स्थानीय सरकारसँग माग गरिएको छ। सम्बन्धित निकायले घटनाको अनुसन्धान सुरु गरेको जनाइएको छ।