धार्मिक सहिष्णुता र सामाजिक सद्भाव कायम राख्न जिल्ला प्रशासनको आग्रह

सर्लाही, मलंगवा ।
तराई–मधेशका केही जिल्लामा पछिल्लो समय धार्मिक सहिष्णुता तथा सामाजिक सद्भावमा खलल पुग्ने खालका गतिविधि देखिन थालेपछि जिल्ला प्रशासन कार्यालय सर्लाहीले गम्भीर ध्यानाकर्षण भएको जनाएको छ।
जिल्ला प्रशासनले सबै जातजाति, भाषा, धर्म, लिङ्ग तथा वर्गका नागरिकलाई संयमित भई धार्मिक सहिष्णुता र सामाजिक सद्भावलाई अक्षुण्ण राख्दै शान्ति–सुरक्षा कायम गर्न सहयोग गर्न आग्रह गरेको छ। नेपाल बहुजातीय, बहुभाषिक, बहुधार्मिक तथा बहुसांस्कृतिक मुलुक भएकाले एक–अर्काको धार्मिक आस्था, विश्वास र अस्तित्वको सम्मानबाट मात्रै राष्ट्र र समाजको विकास सम्भव हुने प्रशासनको भनाइ छ।
प्रेस विज्ञप्तिमा धार्मिक, सांस्कृतिक तथा सामाजिक सद्भावमा खलल पुर्‍याउने खालका गतिविधि, उत्तेजक अभिव्यक्ति तथा अफवाह फैलाउने सामग्री सामाजिक सञ्जाल तथा सञ्चार माध्यममार्फत सम्प्रेषण नगर्न पत्रकार तथा सञ्चारकर्मीहरूलाई समेत अनुरोध गरिएको छ। यस्ता गतिविधिमा संलग्न पाइए कानुन बमोजिम कडा कारबाही गरिने चेतावनीसमेत दिइएको छ।
यसैगरी जिल्लास्थित सबै स्थानीय तहमा स्थानीय शान्ति तथा सामाजिक सद्भाव समिति गठन गरी सक्रिय बनाइने, सबै पक्षसँग समन्वय गर्दै शान्ति–सुव्यवस्था कायम राख्ने निर्णय गरिएको छ। शान्ति सुरक्षाको अवस्था मजबुत बनाउन आवश्यक परे जिल्ला प्रशासन कार्यालयबाट विशेष विज्ञप्ति जारी गरिने पनि प्रशासनले जनाएको छ।
प्रमुख जिल्ला अधिकारी रामु राज कडरिया द्वारा जारी विज्ञप्तिमा सबै पक्षलाई जिम्मेवार भूमिका निर्वाह गर्न पुनः आग्रह गरिएको छ।