निर्वाचनमा सहभागी दलहरूलाई अनुशासनमा रहन आग्रह

काठमाडौं, १० फागुन — निर्वाचन आयोग नेपाल का कार्यवाहक प्रमुख निर्वाचन आयुक्त रामप्रसाद भण्डारी ले आगामी निर्वाचनमा सहभागी सबै राजनीतिक दललाई अनुशासनको परिधिभित्र रहेर स्वच्छ प्रतिस्पर्धा गर्न आग्रह गरेका छन्।
निर्वाचनसम्बन्धी समाचार अभिमुखीकरण कार्यक्रममा बोल्दै आयुक्त भण्डारीले सबै दल एउटै रेखा र समान मापदण्डभित्र रहेर प्रतिस्पर्धा गर्नुपर्ने बताए। “सबै दललाई एउटै समूह, एउटै रेखामा राखेर अनुशासनको परिधिभित्र रही निर्वाचनमा सहभागी हुनुहोला र स्वच्छ प्रतिस्पर्धामा संलग्न हुनुहोला,” उनले आग्रह गरे।
उनले यस पटक ९ देखि १० लाखसम्म नयाँ युवा मतदाता थपिएको जानकारी दिँदै युवाहरूमा नयाँ जोस, जागर र उत्साह देखिएको उल्लेख गरे। “युवाहरू पनि नयाँ ऊर्जा र उत्साहका साथ निर्वाचनमा सहभागी हुँदैछन्,” उनले भने।
आयुक्त भण्डारीले निर्वाचनको वातावरण स्वच्छ, शान्तिपूर्ण र मर्यादित राख्न सबै दल तथा सरोकारवालालाई सहयोग गर्न आग्रह गर्दै निर्वाचनको माहोल विथोल्ने कुनै पनि गतिविधि नगर्न सचेत गराए।