सर्लाहीमा मतदान अधिकृतको ड्युटीकै क्रममा मृत्यु

सर्लाही, मलंगवा।
सर्लाही जिल्लामा निर्वाचन ड्युटीमा खटिएका एक मतदान अधिकृतको अकस्मात् मृत्यु भएको छ। प्रतिनिधि सभा सदस्य निर्वाचनको मतदान चलिरहेकै बेला उनी अचानक बेहोस भएपछि उपचारका लागि अस्पताल लगिएको थियो।
जिल्लाको सर्लाही अन्तर्गत पर्सा गाउँपालिका–४ स्थित जिगडवा आधारभूत विद्यालयको मतदान केन्द्रमा खटिएका रघुनाथ महतो ड्युटीकै क्रममा अचानक ढलेका थिए। उनी करिब ४२–४५ वर्षका रहेको बताइएको छ।
सहकर्मीहरूका अनुसार महतो मतदान प्रक्रिया सञ्चालन गरिरहेका बेला अस्वस्थ महसुस गरी बेहोस भएका थिए। त्यसपछि उनलाई तत्कालै प्रादेशिक अस्पताल मलंगवा पुर्‍याइएको थियो। अस्पताल स्रोतका अनुसार चिकित्सकहरूले दिउँसो करिब २:३० बजे उनलाई मृत घोषणा गरेका थिए।
मृत्युको कारण हालसम्म खुल्न सकेको छैन। पोस्टमार्टम रिपोर्टपछि मात्रै यकिन कारण सार्वजनिक हुने प्रहरीले जनाएको छ।
महतो रौतहट जिल्लाका स्थायी बासिन्दा रहेका र स्वास्थ्य सेवामा समेत आवद्ध व्यक्ति भएको खुलेको छ।
घटनाप्रति निर्वाचन कार्यालय तथा स्थानीय प्रशासनले दुःख व्यक्त गर्दै परिवारजनप्रति समवेदना प्रकट गरेका छन्।