धार्मिक सहिष्णुता र सामाजिक सद्भाव कायम राख्न जिल्ला प्रशासन सर्लाहीको अपिल

मलंगवा, सर्लाही ।

तराई–मधेशका केही जिल्लामा पछिल्लो समय धार्मिक सहिष्णुता र सामाजिक सद्भावमा खलल पुग्ने किसिमका गतिविधि देखिन थालेको भन्दै जिल्ला प्रशासन कार्यालय सर्लाहीले गम्भीर ध्यानाकर्षण भएको जनाएको छ।

जिल्ला प्रशासन कार्यालयद्वारा जारी प्रेस विज्ञप्तिमा सबै जातजाति, भाषा, धर्म, लिङ्ग र वर्गका नागरिकहरूलाई संयमित भई धार्मिक सहिष्णुता तथा सामाजिक सद्भावलाई अक्षुण्ण राख्दै शान्ति–सुरक्षाको प्रत्याभूति गर्न सहयोग गर्न हार्दिक अनुरोध गरिएको छ।

विज्ञप्तिमा नेपाल बहुजातीय, बहुभाषिक, बहुधार्मिक तथा बहुसांस्कृतिक मुलुक भएको उल्लेख गर्दै विविधताभित्रको एकता नै नेपालको पहिचान भएको जनाइएको छ। कुनै पनि धार्मिक आस्था, विश्वास र अस्तित्वको सम्मान गरेमा मात्र राष्ट्र र समाजको विकास सम्भव हुने स्पष्ट पारिएको छ।

धार्मिक सहिष्णुता र सामाजिक सद्भावमा खलल पुर्‍याउने उद्देश्यले गरिने कुनै पनि उत्तेजक गतिविधि तथा भ्रम फैलाउने सामग्रीहरू सामाजिक सञ्जालमार्फत सम्प्रेषण नगर्न आग्रह गरिएको छ। यस्ता गतिविधिमा संलग्न पाइएमा प्रचलित कानुन बमोजिम कडा कारबाही गरिने चेतावनीसमेत दिइएको छ।

जिल्ला प्रशासन कार्यालय सर्लाहीले शान्ति, सद्भाव र सामाजिक एकता कायम राख्न सबै पक्षको सक्रिय सहयोग आवश्यक रहेको उल्लेख गर्दै जिम्मेवार व्यवहार प्रदर्शन गर्न सबैलाई आह्वान गरेको छ।