हरिपुर्वामा हिन्दु जागरण अभियान १६ बुँदे मागसहित हजारौं हिन्दूहरुको उत्साहजनक सहभागीता

सर्लाही,माघ ३
हिन्दु सम्राट सेना नेपाल सर्लाहीको आयोजनामा शनिबार हरिपुर्वामा हिन्दु जागरण अभियान सम्पन्न भएको छ। संगठित हिन्दू ,सुरक्षित हिन्दू भन्ने मुल नाराका साथ आयोजना भएको कार्यक्रममा बालबालिका , महिला , पुरुष , वृद्धवृद्धा गरि हजारौं हिन्दु धर्मावलम्बीहरूको उत्साहजनक सहभागिता रहेको थियो।
अभियानमार्फत नेपाललाई पुनः हिन्दु राष्ट्र घोषणा गर्नुपर्ने मुख्य माग उठाइएको छ। साथै मठ–मन्दिरलाई सरकारी नियन्त्रणबाट बाहिर राखी हिन्दु ट्रस्ट गठन गर्ने, पुजारीलाई मासिक तलबको व्यवस्था गर्ने, जातीय छुवाछूत अन्त्य गर्दै समतामूलक हिन्दु समाज निर्माण गर्नुपर्ने माग राखिएको छ। धर्मान्तरणविरुद्ध कडा कानुन निर्माण र त्यसको प्रभावकारी कार्यान्वयन गर्न सरकारसँग आग्रह गरिएको छ।
अभियानमा भ्रष्टाचार नियन्त्रणका लागि कडा कानुन, प्रत्येक पालिकामा माध्यमिक तहसम्मको गुरुकुल शिक्षा र गौशाला स्थापना, कृषकलाई समयमै बीउ–विजन, मलखाद तथा सिँचाइका लागि निःशुल्क बिजुली उपलब्ध गराउनुपर्ने माग पनि समेटिएको छ। यस्तै, प्रत्येक घरपरिवारलाई १०० युनिटसम्म निःशुल्क बिजुली, सरकारी विद्यालयमा अंग्रेजी माध्यम र नैतिक शिक्षा अनिवार्य गर्नुपर्ने माग अघि सारिएको छ।
स्वास्थ्य सेवाअन्तर्गत प्रत्येक पालिकामा ICU र NICU सेवा स्थापना तथा निःशुल्क एम्बुलेन्सको व्यवस्था गर्नुपर्ने माग गरिएको छ। मुस्लिम आयोग खारेजी वा हिन्दु, बौद्ध र किराँत आयोग स्थापना, विदेशी घुसपैठमा प्रतिबन्ध, डिटेन्सन सेन्टर स्थापना, मदरसा शिक्षा खारेजी तथा जनसंख्या नियन्त्रणका लागि कडा कानुन बनाइनुपर्ने माग पनि जागरण अभियानमा उठाइएको छ।
चारधामलगायत तीर्थस्थलसम्म निःशुल्क तीर्थ यात्राको व्यवस्था गर्नुपर्ने माग राखिँदै शान्तिपूर्ण रूपमा सरकारको ध्यानाकर्षण गराइएको हिन्दू सम्राट सेना नेपालका केन्द्रीय उपाध्यक्ष कृष्णा यादवले बताएका छन्।